Hotstar : గతేడాది డిస్నీ హాట్‌ స్టార్‌.. ఆసియా కప్‌తో పాటు వన్డే వరల్డ్‌ కప్‌ను ఉచితంగా అందించింది. వన్డే వరల్డ్‌ కప్‌ సమయంలో ఎలాంటి రుసుము లేకుండా అభిమానులకు అసలైన క్రికెట్‌ మజాను పంచింది. ఇప్పుడు అదే బాటలో మరో ఐసీసీ ట్రోఫీని…
Hotstar : భారత క్రికెట్‌ అభిమానులకు ప్రముఖ ఓటీటీ యాప్‌ డిస్నీ హాట్‌ స్టార్‌ గుడ్‌ న్యూస్‌ చెప్పింది. ఈ ఏడాది వెస్టిండీస్‌ – అమెరికా వేదికగా జరగాల్సి ఉన్న టీ20 వరల్డ్‌ కప్‌ లైవ్‌ ప్రసారాలను భారత ప్రేక్షకులకు ఉచితంగా అందించనుంది. ఐపీఎల్‌ ముగిసిన వెంటనే పొట్టి ప్రపంచకప్‌ మొదలవనుందన్న విషయం తెలిసిందే. విండీస్‌ దీవులతో పాటు అమెరికాలో జరుగబోయే ఈ మెగా టోర్నీ జూన్‌ 2 నుంచి 29 వరకూ జరుగుతుందని ఐసీసీ ఇదివరకే ప్రకటించింది.
మెగా టోర్నీలను భారత క్రికెట్‌ అభిమానులకు ఉచితంగా అందించడం హాట్‌ స్టార్‌కు ఇదే కొత్తకాదు. గతేడాది ఆ సంస్థ.. ఆసియా కప్‌తో పాటు వన్డే వరల్డ్‌ కప్‌ను ఉచితంగా అందించింది. వన్డే వరల్డ్‌ కప్‌ సమయంలో ఎలాంటి రుసుము లేకుండా అభిమానులకు అసలైన క్రికెట్‌ మజాను పంచింది. ఇప్పుడు అదే బాటలో మరో ఐసీసీ ట్రోఫీని ఉచితంగా ప్రసారం చేయనుంది. అయితే ఈ ఫ్రీ సౌకర్యం కేవలం మొబైల్‌ యూజర్స్‌కు మాత్రమే.. స్మార్ట్‌ టీవీలు, ఆన్‌లైన్‌లలో ల్యాప్‌టాప్‌ల ద్వారా వీక్షించే వారు మాత్రం యథావిధిగా సంబంధిత రుసుము చెల్లించి మ్యాచ్‌లు చూడాలి.
డిస్నీ గత వారం రిలయన్స్‌తో జట్టుకట్టిన విషయం తెలిసిందే. భారత మీడియా రంగంలో సంచలనం సృష్టించిన ఈ విలీనం విలువ.. రూ. 70 వేల కోట్లు అని మార్కెట్‌ వర్గాలు చెబుతున్నాయి.